22 снежня суд Рагачоўскага раёна вынес вырак па крымінальнай справе аб абразе прадстаўніка ўлады

Судзілі мясцовага жыхара Аляксандра Кандорскага. Судовае пасяджэнне ўзначальвала суддзя Ірына Прадун. Дзяржабвінаваўца - Папоў.

Вядома, што Аляксандру Кандорскаму 33 гады, ён працуе вадзіцелем-экпедытарам у прыватнай фірме, мае двух дзяцей і вельмі добрыя характарыстыкі.

Справа, па якой асудзілі мужчыну, была распачатая ў Віцебску яшчэ у 2020-м годзе за абразу міліцыянта Войніча, але потым яе перадалі ў Рагачоўскі РОСК.

У кастрычніку мінулага года пад відэа пра разгон мірнай акцыі, якое у сваім пасце ў Аднакласніках размясціла Вольга Карач, Аляксандр аставіў каментар «на кол». Усяго пад тым пастом людзі напісалі 1870 негатыўных каментароў пра дзеянні міліцыянта Войніча. І гэта ўжо далека не першая справа, па якой ён праходзіць пацярпелым.

Каментар Аляксандра Кандорскага адправілі на лінгвістычную экспертызу. Па яе выніках высветлілася, што ў ім «няма элементаў агрэсіі і закліку да гвалту». Падчас суда абвінавачаны сказаў, што той свой каментар ён напісаў на эмоцыях.

Пацярпелага міліцыянта Войніча падчас суда апыталі па скайпе. Пра тое відэа і пра свае дзеянні на ім ён сказаў так: «Я выконваў загад. Быў несанкцыянаваны мітынг, і нам загадалі яго разагнаць».

Войніч дадаў, што каментар Аляксандра Кандорскага прычыніў яму «крыўду, сорам, горыч, абурэнне». У выніку, па словах міліцыянта, яму нават прыйшлося звярнуцца па дапамогу да псіхолага. Пацярпелы заявіў, што ў якасці маральнай кампенсацыі за абразу ён патрабуе 1500 рублёў.

Дзяржабвінаваўца палічыў што ў адносінах да Войніча было здзейснена злачынства «выяўленае ва ўзбуджэнні палітычнай варожасці». У пасяджэнні быў аб'яўлены невылікі перапынак, пасля чаго прысуд абвінавачанаму вынеслі на выяздным пасяджэнні суда ў будынку РАУСа.

Аляксандра Кандорскага прызналі вінным ў здзяйсненні злачынства па арт. 369 «Абраза прадстаўніка ўлады» і прысудзілі два гады абмежавання волі з накіраваннем у папраўчую установу адкрытага тыпу.

Крыніца: Два гады «хіміі» за каментар «на кол». Яшчэ аднаго беларуса судзілі за абразу міліцыянта Войніча