Паводле міліцэйскага пратаколу, 12 кастрычніка Таццяна Севярынец парушыла парадак арганізацыі масавага мерапрыемства і ўзяла актыўны ўдзел у несанкцыянаваным вулічным шэсці. Супрацоўнікі МУС сцвярджалі, што жанчына знаходзілася ў групе грамадзянаў, якія выказвалі свой пратэст супраць вынікаў выбараў прэзідэнта, пляскала ў далоні, выгуквала лозунгі грамадска-палітычнага характару. Дзеянні кваліфікаваныя паводле ч.3 арт. 23.34 КаАП.
З пратаколам Таццяна Севярынец не пагадзілася і ягоны змест, «ад першага да апошняга слова», назвала няпраўдай. Адзінае, што адпавядала рэчаіснасці, паводле Таццяны, дык гэта толькі маршрут руху ад ГЦ «Марка-Сіці» да будынку Віцебскага гарвыканкаму. На судзе Севярынец патлумачыла, што «ішлі спакойна, ніхто не мітынгаваў, абмяркоўвалі тое, пра што збіраліся размаўляць у гарвыканкаме, пакуль чакалі адказу з гарвыканкаму, праспявалі «Купалінку».
«Мэта, з якой мы сабраліся з жанчынамі, была зусім іншая, а ў пратаколе – казкі Шахеразады. Ведаючы, што ў панядзелак а 15-й гадзіне мусяць сабрацца людзі сталага веку з багатым жыццёвым досведам, я вырашыла, што гэта добрая нагода схадзіць у гарвыканкам. Запішамся на прыём альбо нас прымуць адразу. Мы хацелі найперш пагаварыць з Заранкіным, нагадаць, што ўлада – для народу, а не народ для ўлады. Хацелі патлумачыць, чаму людзі выходзяць, папрасіць, каб таго гвалту, які адбываецца на нашых вуліцах, не чынілася больш», – патлумачыла Таццяна Севярынец.
У гарвыканкаме дэлегацыю з трох чалавек прыняў начальнік аддзелу па працы са зваротамі грамадзянаў Ўладзімір Вераб’ёў. Яны паразмаўлялі і запісаліся на прыём на сераду. Сустрэча адбылася а 8-йраніцы.
«Мы ішлі, каб сказаць уладам: хопіць гэтага гвалту на вуліцах Віцебску! Замест гэтага ў Дзень маці мяне затрымалі, і я правяла ў РАУСе амаль суткі. Ведаеце, усе гэтыя суды і пратаколы людзей не спыняць. З людзьмі так нельга! Як настаўнік, я ведаю, што самы горшы метад працы – гэта гвалт… Мы ўсе хочам, каб нас разумелі. І калі нас улада пакрыўдзіла, то як можна маўчаць? У нас не было масавага шэсця. Так, мы ішлі разам, але мы ішлі ў канкрэтнае месца», – сказала Тацяна Севярынец.
Падчас разбору былі прагледжаны відэаматэрыялы, якія паступілі ў суд. Яны не засведчылі актыўнага ўдзелу Севярынец у мерапрыемстве. Але суддзя Вераніка Барысава ўбачыла ў дзеяннях Таццяны Севярынец склад правапарушэння і аштрафавала яе на 30 базавых велічынь (810 рублёў).
С. Горкі