На пасадзе суддзі аршанскага суда Кацярына Мажэйка разбірала адну са шматлікіх адміністрацыйных справаў Дзмітрыя Казлова ў 2019 годзе. 2 снежня яго судзілі за парушэнне парадку арганізацыі масавых мерапрыемстваў ( на той час ч.1 арт.23.34 КаАП). Паводле пратаколу, Дзмітрый Казлоў парушыў заканадаўства, разьмясціўшы 12 лістапада на сваім Youtube-канале відэаролік «Сустрэнемся на Кастрычніцкай плошчы» -нібыта ў гэтым роліку «ўтрымліваўся публічны заклік да ўдзелу ў несанкцыянаванай акцыі», якая павінна была прайсці 15 лістапада ў Мінску.

Суд доўжыўся не больш за 30 хвілін. Судзьдзя Кацярына Мажэйка зачытала пратаколы, матэрыялы справы, прадэманстравала відэаролік, сведак на працэсе  не было. У выніку – яна  палічыла віну Дзмітрыя Казлова даказанай і пакарала яго штрафам у памеры 20 базавых велічынь (на той час 510 рублёў).

Перад тым блогер быў вымушаны правесці двое сутак пад вартай у ізалятары часовага ўтрымання. Яго затрымалі 30 лістапада ў Аршанскім РАУС, куды яго выклікалі позвай «у якасьці ўдзельніка адміністрацыйнага працэсу». На суд Дзмітрыя Казлова  суправаджалі 8 супрацоўнікаў міліцыі.

Гэта быў першы суд з цэлага шэрагу судовых разбораў па “адміністратыўках”, і ён скончыўся толькі штрафам. Пасля гэтага Дзмітрыю Казлову прызначалі арышты, і ён адбыў пад вартай агулам больш за 90 сутак.

Уладзімір Бяляўскі