Газету «Голас Сенненшчыны» можна ўганароўваць адмысловым прызам за майстэрства нічога не напісаць па сутнасці важных пытанняў. У артыкуле «На заседании райисполкома рассмотрели актуальные вопросы» яны толькі пералічаны.

Таксама ў ім працытаваны выказванні старшыні райвыканкама Алега Макарэвіча – гучныя фразы, якія не маюць аніякай сэнсавай нагрузкі. Што канкрэтнага, да прыкладу, чытачы газеты і наведнікі сайта «раёнкі» могуць даведацца з наступнага набору словаў: «Мы прикладываем много усилий, чтобы наши населенные пункты стали чище, уютнее, краше. Необходимо уделить должное внимание для создания безопасных условий труда и для проживания». Або: «Сегодня очень важно, чтобы каждый человек почувствовал ответственность за жизнь и здоровье не только свое, но и окружающих, товарищей по работе, а руководители — за структурные подразделения и подчиненных».

«От уровня организации работы с людьми по всем направлениям, от взаимодействия районных структур и управленческих решений, которые мы принимаем, напрямую зависит качество жизни населения района», - заявіў Алег Макарэвіч. Але не прывёў ніводнага факта пра тое, як у раёне працуюць з патрабаваннямі Дырэктывы №1 або як рэалізуецца праграма «Комфортное жилье и благоприятная среда».

Або нешта такое гучала на пасяджэнні, але газета вырашыла, што няма чаго распавядаць пра гэта чытачам. Затое ў дадатак да артыкула з некалькіх сказаў выйшаў фотарэпартаж, дзе на 9-ці непадпісаных здымках невядомыя людзі выступаюць за трыбунай або сядзяць у залі. Дарэчы, распытаць пра нешта ў прыватным парадку таксама не атрымаецца: у газеце няма магчымасці для каментавання матэрыялаў.

Знайсці на сайце выдання нейкія іншыя артыкулы, прысвечаныя пытанням, якія разгладаліся на апошнім пасяджэнні райвыканкама, таксама практычна не магчыма.

Ларыса Кажэўнікава