Скарга рабочых тычылася штрафу прафсаюзным актывістам за пікет у горадзе Полацку. Самі рабочыя лічаць гэты штраф незаконным, бо пікет ладзіўся ў межах прафсаюзнай дзейнасьці на рашэньне кіроўнага калегіяльнага органу прафсаюзу. Паводле Статуту СПБ сябры прафсаюзу абавязаныя выконваць рашэньні Савету прафсаюзу, што яны і зрабілі.

Больш таго, прафсаюзныя актывісты адзначаюць, што нікому ніякай шкоды пікет не нанёс, а адміністрацыйны кодэкс Беларусі прадугледжвае вызваленьне ад адказнасьці пры малазначных парушэньнях, нават калі прызнаваць, што правапарушэньне мела месца.

Адказ на скаргу, падпісаны Марынай Паповай, вытрыманы ў бюракратычных традыцыях. На пачатку ліста пералічваюцца артыкулы падатковага і адміністрацыйнага кодэксаў. Спадарыня Папова чамусьці запатрабавала даверанасьць ад старшыні прафсаюзу на прадстаўленьне інтарэсаў сябра прафсаюзу, як быццам скарга ў пракуратуру прафсаюзу была накіраваная ад фізычнай асобы, хоць яна была надрукаваная на блянку Першаснай арганізацыі СПБ рабочых ААТ «Полацак-Шкловалакно».

Начальнік аддзелу па наглядзе за выкананьнем правоў і свабод грамадзян Марына Папова зусім не ўзяла пад увагу, што існуе Закон аб прафсаюзах, які гарантуе права прафсаюза зьвяртацца ў дзяржаўныя органы. Апроч таго, у скарзе прафсаюзу згадваецца парушэньне міжнародных забавязаньняў Рэспублікі Беларусь, якія гарантуюць правы працоўных, за выкананьнем якіх якраз і павінен сачыць аддзел Генэральнай пракуратуры.

Як пракамэнтаваў сытуацыю намесьнік старшыні СПБ Мікола Шарах, у Генэральнай пракуратуры не змаглі адрозьніць зварот прафсаюзу ад нагляднай скаргі.

«Яны гэтак сьпяшаліся з адпіскай, што не змаглі нават правільна прачытаць прозьвішча прадстаўніка прафсаюзу. Ня думаю, што ўся рэч у нізкай кваліфікацыі пракурорскіх работнікаў. На мой погляд, гэта добры прыклад таго, як гэты дзяржаўны орган, які ўтрымліваецца за кошт падаткаплацельшчыкаў і абавязаны кантраляваць выкананьне іх правоў, не выконвае свае функцыі», - заявіў Мікола Шарах.

Аляксандар Марозаў