На пачатку красавіка быў абвешчаны збор подпісаў пад пэтыцыяй супраць усталяваньня ў Віцебску помніка княгіні Вользе. Аўтары калектыўнага звароту назвалі 7 прычын, чаму гэты помнік будзе недарэчным у абласным цэнтры. 17 траўня атрымалі адказ: падставаў, каб адмовіцца ад праекту, няма.

У 1898 годзе ў будынку гарадзкога яхт-клюбу ў Віцебску адбыўся першы кінапаказ стужак славутых братоў Люм’ер. Віцебск стаў першым горадам Беларусі, які пабачыў сапраўднае кіно. 120-й гадавіне той падзеі і прысьвечаная выстава “Віцебск. Час нямых зорак”, якая адкрылася ў ратушы пры падтрымцы амбасадаў ЗША і Летувы ў Беларусі.

Курсы “Мовы нанова” распачалі сваю працу  ў Глыбокім і Шаркоўшчыне. Першыя заняткі правялі Глеб Лабадзенка і Алеся Літвіноўская.  Пасьля ўводнага слова Глеб знаёміў прысутных  з тэмай “Сваякі”, а Алеся распавядала пра мянушкі, якія давалі і даюць беларусы адно аднаму.

Старшыня Віцебскай абласной арганізацыі Беларускага саюзу мастакоў Сьвятлана Баранкоўская прэзэнтавала ў абласной бібліятэцы першую ў сваім жыцьці пэрсанальную выставу жывапісу – “Нечаканае”. Яе габэлены ведаюць усе, пра жывапіс – толькі здагадваліся. Добрая неспадзяванка!