Ушанаваць памяць беларускіх герояў, якія не пабаяліся прыняць няроўны бой з ворагамі Радзімы, прыехала і настаўніца зь Лёзна Алена Грачышнікава, дзякуючы якой у Пагосьцішчы зьявіўся крыж у гонар інсургентаў. На пачатку на месцы сучаснага крыжа былі сабраныя камяні, але потым яны былі раскіданыя невядомымі. Цяпер на памятным месцы стаіць крыж. Краязнаўца і грамадзкі актывіст Алесь Шутаў правёў для гасьцей невялікі экскурс у гісторыю, прадстаўнік руху «За свабоду» Юры Нагорны нагадаў, што пісаў пра паўстаньне сам яго ініцыятар Кастусь Каліноўскі. На полі побач з крыжам адбыўся выступ барда Георгія Станкевіча.

Даведка. Аршанскі атрад пад кіраўніцтвам Ігната Будзіловіча. Касінеры, аб'яднаныя ў Аршанскі атрад, налічвалі каля 50 чалавек і бралі ўдзел у паўстаньні Кастуся Каліноўскага ў 1863 годзе. 26 красавіка таго году каля вёскі Пагосьцішча сучаснага Лёзьненскага раёну паўстанцы пад кіраўніцтвам Будзілавіча былі насьцігнутыя расейскімі войскамі ў колькасьці 90 чалавек. Паўстанцы былі вымушаныя адступіць за дом, дзе яны апынуліся на маленькай пляцоўцы, зь якой было складана весьці далейшы бой. У выніку бою былі ўзятыя ў палон 21 чалавек, 6 былі забітыя, 3 параненыя. Частцы атраду атрымалася ўцячы, але зноў яны ўжо не сабраліся. З боку расейцаў былі забітыя 2 чалавекі і адзін паранены. Сам кіраўнік Аршанскага атраду Ігнат Будзіловіч быў расстраляны ў Аршанскай турме 28 жніўня 1863 году.

Крыніца: Орша.eu