Яшчэ некалькі кар’ерных узлётаў для суддзяў, якія выносілі выракі па палітычна матываваных справах

Панядзелак, 16 Люты 2026

Яшчэ некалькі кар’ерных узлётаў для суддзяў, якія выносілі выракі па палітычна матываваных справах

Ацаніць гэты матэрыял

(0 галасоў)

Яшчэ некалькі кар’ерных узлётаў для суддзяў, якія выносілі выракі па палітычна матываваных справах

Як мы ўжо пісалі, паводле Указа Аляксандра Лукашэнкі “Аб прызначэнні і вызваленні суддзяў” №46 ад 12 лютага на падвышэнне пайшла суддзя Іна Грабоўская – яна вынесла прысуд ксяндзу Анджэю Юхневічу і неаднаразова карала суткамі і арыштамі жыхароў Віцебска і Шуміліна. Замест яе на пасаду старшыні Шумілінскага райсуда прызначана Ірына Жарова. Яе перавялі з Наваполацкага гарадскога суда. Там, на пасадзе суддзі, сярод іншых яна пакарала за ўдзел у пратэстах 2020 г. расонскага прадпрымальніка Дзмітрыя Цюкаева.

Таксама Ірына Жарова вядомая тым, што пастанавіла зрабіць больш жорсткім рэжым утрымання палітвязня, каардынатара "Еўрапейскай Беларусі" Яўгена Афнагеля - перавяла яго на два гады на турэмны рэжым.

Замест яе на працу ў Наваполацк перавялі былую суддзю Верхнядзвінскага суда Таццяну Кукліну. Гэта яна дала 15 сутак віцебскаму апазіцыянеру Барысу Хамайду за малюнак “Пагоні” на вокладцы пашпарта. 10 сутак паводле яе рашэння адседзеў кіроўца-дальнабойшчык Аляксандр Каваленка - ў кабіне яго аўто інспектарам мытні быў знойдзены вымпел з гербам "Пагоня". Яна ж пастанавіла арыштаваць на 15 сутак за распаўсюд «экстрэмісцкіх» матэрыялаў у сацыяльных сетках мясцовага прадпрымальніка Вячаслава Дамбоўскага і аштрафавала на 25 базавых велічынь маці двух малалетніх дзяцей Таццяну Лапкоўскую -у сацыяльнай сетцы «Аднакласнікі» у яе знайшлі матэрыялы тэлеканала «Белсат».

Суддзю Ірыну Яскевіч (на фота) падвысілі да старшыні райсуда ў Мёрах. Гэта яна ў 2022 годзе пакарала зняволеннем настаўніцу-пенсіянерку, экс-палітзняволеную Эму Сцепулёнак, прызнаўшы яе вінаватай у абразе Лукашэнкі і прадстаўнікоў улады. Апроч гэтага, цягам апошніх год яна вынесла дзясяткі рашэнняў пра штрафы і арышты за распаўсюд “экстрэмісцкіх матэрыялаў” і "пікетаванне ў інтэрнэце". У ліку асуджаных - работнік мясакамбіната, прыбіральшчыца, слесар, электраманцёр, некалькі работніц мясцовай бальніцы, кантралёр-касір, былы міліцыянт, ксёндз - пробашч парафіі ў Ідолце Вячаслаў Адамовіч, настаўнік найвышэйшай катэгорыі, стваральнік некалькіх музеяў, кіраўнік музейнага абʼяднання «Спадчына Міёрскага краю», лаўрэат дзяржаўнай прэміі «За духоўнае адраджэнне», уганараваны ў 2010-м годзе званнем «Чалавек года Віцебшчыны» Вітольд Ермалёнак.

Ларыса Горына

Апублікавана ў Суд