На раніцу 14 студзеня быў запланаваны працяг судовага разгляду крымінальнай справы ў дачыненні да Вадзіма Дзмітронка. Аднак падсудны не быў дастаўлены ў працэс, а суддзя Таццяна Акавітая аб'явіла перапынак на невызначаны тэрмін - у сукамерніка абвінавачанага выявілі каранавірусную інфекцыю.
Як піша Радыё Свабода, адвакатка Вадзіма Дзмітронка заявіла, што без падсуднага весці працэс немагчыма. Пасля пасяджэння яна расказала, што ў сераду бачылася са сваім падабаронным на Валадарцы, ён адчувае сябе нармальна, не захварэў, аднак у камеры абвешчаны каранцін.
Нагадаем, Вадзіма Дзмітронка абвінавачваюць паводле чатырох крымінальных артыкулах.
- ч. 2 арт. 296 – “Незаконныя выраб або збыт халоднай зброі”;
- ч. 1 арт. 342 – “Арганізацыя групавых дзеянняў, якія груба парушаюць грамадскі парадак і спалучаныя з відавочным непадпарадкаваннем законным патрабаванням прадстаўнікоў улады або якія пацягнулі парушэнне працы транспарту, прадпрыемстваў, устаноў або арганізацый, альбо актыўны ўдзел у такіх дзеяннях пры адсутнасці прыкмет больш цяжкага злачынства”;
- арт. 14 – “Замах на злачынства”;
- ч. 2 арт. 293 – “Удзел у масавых беспарадках, якое выказалася ў непасрэдным здзяйсненні дзеянняў, названых у частцы 1 артыкула: гвалтам над асобай, пагромамі, падпаламі, знішчэннем маёмасці або узброеным супрацівам прадстаўнікам улады”.
Першае пасяджэнне адбылося 12 студзення - на ім быў апытаны сведка, вывучаныя пісьмовыя матэрыялы справы, свае паказанні прадставіў і абвінавачаны, сёння планаваліся спрэчкі бакоў.
Чатыры артыкулы і сведка ў балаклаве. У Мінску судзяць Вадзіма Дзмітронка
Праваабрончы цэнтр “Вясна” з дапамогай валанцёраў адсочвае судовы працэс.
Крыніца: Суд над Вадзімам Дзмітронкам прыпынілі праз каранавірус