Праваабарончы цэнтр “Вясна” з пачатку выбарчай кампаніі 2020 года актыўна сочыць за крымінальнымі справамі, якія маюць палітычна матываваны характар і якія былі ўзбуджаныя супраць удзельнікаў прэзідэнцкай гонкі, актывістаў іх штабаў, удзельнікаў поствыбарчых акцый пратэсту. Вядома больш за 650 імёнаў і прозвішчаў такіх людзей з розных гарадоў краіны. 166 чалавек з гэтага спісу на дадзены момант з'яўляюцца палітычнымі зняволенымі.
Крымінальны пераслед з пачатку выбарчай кампаніі. Спіс ад праваабаронцаў "Вясны"
У апошнія два месяцы 2020 года крымінальныя справы пачалі перадаваць у суды. Згодна са звесткамі, якія атрымалася сабраць “Вясне”, да канца 2020 года былі вынесены як мінімум 103 прысуды па крымінальных справах, звязаных з падзеямі, што адбываліся падчас і пасля прэзідэнцкіх выбараў.
З большага гэта справы, узбуджаныя па арт. 364 Крымінальнага кодэксу (Гвалт альбо пагроза прымянення гвалту ў дачыненні да супрацоўніка органаў унутраных спраў), 363 (Супраціў супрацоўніку органаў унутраных спраў або іншай асобе, якая ахоўвае грамадскі парадак) і 342 (Арганізацыя або актыўны ўдзел у групавых дзеяннях, якія груба парушаюць грамадскі парадак). Разгледжана больш за дзясятак спраў па дыфамацыйных артыкулах за знявагу дзяржаўнай сімволікі (арт. 370 КК, некаторыя справы за "абразу" сцяга кваліфікаваліся як хулігантсва па арт. 339 КК), абразу прадстаўніка ўлады (369 КК) і прэзідэнта (368 КК), паклёп (188 КК) і інш.
Таксама была разгледжана першая крымінальная справа аб нібыта рыхтуючыхся масавых беспарадках у Навагрудку і некаторых іншых раёнах Гарадзенскай вобласці (па ч. 1 і ч. 3 арт. 293 КК). Адзін з яе фігурантаў – палітвязень Уладзімір Гарох – атрымаў 7 гадоў пазбаўлення волі ў калоніі ўзмоцненага рэжыму. Гэтае пакаранне на дадзены момант з’яўляецца самым жорсткім з усіх вынесеных па палітычных справах 2020 года.
Праваабаронцам вядома пра наступную колькасць асуджаных па палітычна матываваных справах па рэгіёнах:
- 40 асуджаных у Мінску (з іх 18 чалавек атрымалі пазбаўленне волі тэрмінамі ад 2 да 5 гадоў);
- 8 – у гарадах Мінскай вобласці;
- 7 – па Магілёўшчыне (5 чалавек атрымалі ад 1 да 4 гадоў калоніі, два чалавекі – Станіслаў Паўлінковіч і Валадар Цурпанаў – асуджаны на абмежаванне волі з наікраваннем ("хімія") за абразу магілёўскіх суддзяў).
- 11 – у Віцебскай вобласці (6 з іх атрымалі пазбаўленне волі тэрмінамі ад 1,5 да 4,5 гадоў. Амаль усе справы звязаны з гвалтаў адносінах да міліцыі на акцыях пратэсту (арт. 364 КК, 366 КК))
- 13 – у Гомельскай вобласці (з іх 6 чалавек атрымалі ад 1 да 5 гадоў калоніі. Сярод іх – Аляксей Раманаў і Аляксандр Кулага, асуджаныя на 1 і 2 гады калоніі за абразу прэзідэнта па арт. 368 КК).
- 11 – на Брэстчыне (3 чалавекі былі пазбаўлены волі, 4 чалавекі з розных раённых цэнтраў атрымалі па году “хіміі” за знявагу дзяржаўнага сцяга па арт. 370 КК)
- 13 – у Гарадзенскай вобласці (большасць з іх атрымала тэрміны да 4 гадоў абмежавання волі з накіраваннем у папраўчыя ўстановы ці без яго, 3 чалавек пазбавілі волі).
“Вясна” нагадвае, што маніторынг крымінальных палітычна матываваных спраў мае важнае значэння для ацэнкі сітуацыі з парушэннямі правоў чалавека ў час масавых рэпрэсій, а агалоска такога пераследу можа дапамагчы стрымаць магчымыя фальсіфікацыі і выяўляць працэсуальныя парушэнні пад час следства альбо суда.
Таму калі вас ці вашых блізкіх затрымалі альбо ўжо асудзілі па крымінальнай справе, якая можа мець палітычную афарбоўку, абавязкова паведамляйце нам праз тэлеграм-бот @viasna_bot ці на гарачую лінію:
- +375 17 377 55 40
- +375 44 734 45 51
- +375 29 835 94 49
Крыніца: У 2020 годзе больш за 100 чалавек былі асуджаны па крымінальных палітычных справах