Сёння, 7 чэрвеня, у судзе Цэнтральнага раёна распачынаецца разгляд крымінальнай справы супраць палітзняволенай журналісткі і галоўнай рэдактаркі газеты "Новы Час" Аксаны Колб. Яе абвінавачваюць па ч. 1 арт. 342 Крымінальнага кодэкса — арганізацыя дзеянняў, якія груба парушаюць грамадскі парадак, або актыўны ўдзел у іх. Аксана два з паловай месяцы ўтрымліваецца за кратамі. Яе справу будзе разглядаць сумнавядомы суддзя Дзмітрый Карсюк.  Нагадаем, раніцай 20 красавіка група сілавікоў са шчытамі і кувалдамі прыехала ў кватэру, дзе жыве журналістка: яны паведамілі, што забіраюць жанчыну на допыт у Следчы камітэт, з якога яе так і не выпусцілі.

Аксана Колб. Фота: "Новы Час"

На наступны дзень Камітэт абароны журналістаў патрабаваў неадкаладна вызваліць затрыманую рэдактарку газеты «Новы Час» Аксану Колб.

"Затрыманне Колб паказвае, што сітуацыя з журналістамі ў Беларусі застаецца вельмі трывожнай, і што ўлады поўныя рашучасці нацэліцца на нешматлікія незалежныя СМІ, што засталіся ў краіне.

Улады павінны неадкладна вызваліць Колб без прад'яўлення абвінавачанняў разам з усімі іншымі журналістамі, якія ў цяперашні час знаходзяцца пад вартай, і дазволіць сродках масавай інфармацыі свабодна працаваць", — заявіў дырэктар праграмы CPJ Карлас Марцінес дэ ла Серна.

Ужо праз два дні — 22 красавіка — стала вядома, што ёй выставілі абвінавачванне паводлеч. 1 арт. 342 Крымінальнага кодэкса — арганізацыя ідзеянняў, якія груба парушаюць грамадскі парадак, або актыўны ўдзел у іх. Аксану перавялі ў мінскі СІЗА-1, дзе яна атрымліваецца па сённяшні дзень. 

У лісце на волю Аксана дзякуе за канверты і маркі, а таксама піша, што марыць па вызваленні сустрэцца з сябрамі і знаёмымі:

"Так прыемна ведаць, што цябе падтрымліваюць і памятаюць. Адчуваеш, што не дарэмна жыў і працаваў.

Мару пра тое, што калі выйду на волю, абавязкова збяру ўсіх сяброў і знаёмых, каб разам парадавацца жыццю і сусвету. Каб як мага больш добрых і сумленных людзей пазнаёміліся паміж сабой. Каб пах чабор і квітнела Беларусь".

Судовы працэс над Аксанай распачнецца сёння ў 10:30 у судзе Цэнтральнага раёна Мінска.

Інфармацыя будзе дапаўняцца.

Газета «Новы час» выдавалася з 2002 году на беларускай мове. Яна была з нямногіх недзяржаўных газэтаў, якая трапляла ў турмы, — яе можна было выпісаць палітвязням, але ў 2021 годзе газету выключылі з сістэмы афіцыйнага распаўсюджвання, і рэдакцыя стала рассылаць газету ў канвэртах, у тым ліку палітвязням у турмы. У жніўні 2021 году «Новы час» перастаў выходзіць на паперы, бо друкарні адмаўляліся яе друкаваць. Восенню 2021 года ў Беларусі заблакавалі і сайт выдання, з таго часу журналісты публікуюць свае матэрыялы на люстэрку сайта і ў сацсетках.

Журналістаў выдання і Аксану раней затрымлівалі, канфіскоўвалі тэхніку. Сталыя аўтары "Новага часу" Дзяніс Івашын і Мікалай Дзядок — палітвязні і знаходзяцца за кратамі.

Крыніца: У Мінску сёння пачнуць судзіць галоўную рэдактарку газеты "Новы Час" Аксану Колб