15 і 16 лютага суд Маскоўскага раёна Брэста разгледаў справу Ігара Новіка, якому прад'явілі абвінавачванні паводле ч. 1 і ч. 2 арт. 368 "Абраза прэзідэнта Рэспублікі Беларусь", а таксама паводле арт. 341 "Апаганьванне збудаванняў і псаванне маёмасці".

Судовае пасяджэнне ўзначаліла суддзя Марына Скалковіч. Дзяржабвінавачванне падтрымлівала Алена Шарко.

Ігара Новікава абвінавацілі ў тым, што з красавіка па снежань 2021 года ён зрабіў 7 надпісаў на фасадах будынкаў, за што яму і інкрымінавалі арт. 341 КК РБ.

Як паведамляе  "Берасцейская Вясна", два з гэтых надпісаў абражалі Лукашэнку. Таму за надпіс "Лукашенко психованная крыса" мужчыну абвінавацілі ў здзяйсненні злачынства паводле ч. 1 арт. 368 КК РБ. А за "Жыве Беларусь. Лукашенко псих и убийца. В Гаагу" прад'явілі абвінавачванне паводле ч. 2 арт. 368 КК РБ.

Вядома, што з 4 снежня 2021 года мужчына знаходзіўся пад вартай.

Падчас судовага пасяджэння Ігар Новік цалкам прызнаў сваю віну. Па сукупнасці артыкулаў бок дзяржабвінавачвання запатрабаваў для яго пакаранне ў выглядзе двух гадоў зняволення ў калоніі агульнага рэжыму.

16 лютага суд Маскоўскага раёна Брэста прызнаў Новіка вінаватым у здзяйсненні злачынстваў паводле арт. 341 КК РБ, а таксама паводле ч. 1 і ч. 2 арт. 368 КК РБ, прызначыўшы яму два гады калоніі агульнага рэжыму.

Крыніца: За надпісы на фасадах і абразу Лукашэнкі жыхара Брэста пакаралі двума гадамі калоніі