7 верасня суд Маскоўскага раёна горада Мінска прысудзіў 22-гадоваму Кірылу Пальчэўскаму тры гады і адзін месяц пазбаўлення волі ў калоніі агульнага рэжыму паводле арт.342 і арт.415. Пальчэўскі — чалавек, які мае інваліднасць. Паводле арт.342 КК яго асудзілі да пазбаўлення волі тэрмінам на два гады, паводле арт.415 КК — да пазбаўлення волі, тэрмінам на адзін год. Канчатковае пакаранне прызначанае шляхам сукупнасці пакаранняў шляхам іх поўнага складання. Таксама да яго далучылі часткова не адбытую частку папярэдняга пакарання — два месяцы "хатняй хіміі".
Прысуд вынес суддзя Мотыль. Бок абвінавачання падтрымаў памочнік пракурора Серакоў.
Кірыл быў затрыманы 15 чэрвеня і з таго часу знаходзіцца пад вартай.
У чым прызналі вінаватым?
У межах артыкула 342 КК Кірыла Пальчэўскага прызналі вінаватым у тым, што 13 верасня 2020 года ён з 13.59 да 19.20 прыняў удзел у дзеяннях, якія груба парушаюць грамадскі парадак. Згодна з абвінавачаннем, ён дзейнічаў з карыслівых памкненняў, а таксама па папярэдняй змове з групай асобаў: выкрыкваў лозунгі, гучна пляскаў у далоні, рухаўся ў счэпцы, парушаў права прыстойных грамадзян на спакойнае жыццё. У тэксце абвінавачання былі пералічаныя ўсе вуліцы, крамы і арганізацыі, спакой якіх парушыў мужчына.
Паводле арт.415 КК Кірыла Пальчэўскага прызналі вінаватым у тым, што ён парушыў правілы адбыцця свайго ранейшага пакарання: двух гадоў "хатняй хіміі", падчас якога ён здзейсніў шмат парушэнняў.
Што казаў абвінавачаны?
Пальчэўскі распавёў, што ў той дзень ён схадзіў у гандлёвы цэнтр, потым прысеў на вуліцы ў кафэ, калі да яго падыйшоў мужчына і прапанаваў зарабіць грошы. Ён прапанаваў Кірылу ісці наперадзе калоны, паказваць, куды ісці людзям. У выніку грошы мужчына не заплаціў. Пільчанка цалкам прызнаў віну.
Суддзя зрабіў перапынак праз празмерную знерваванасць Пальчэўскі падчас ягоных паказанняў.
Якія матэрыялы разглядаліся падчас справы?
У выніку пасля перапынку Мотыль пастанавіла разглядзець суд у паскораным рэжыме без выкліка сведак — ніхто не быў супраць. Згодна з фота- і відэаматэрыяламі, Пальчэўскі стаяў у счэпцы і рэгуляваў рух транспарта. Экспертыза прызнала дыягназ мужчыны, згодна з якім ён мае псіхічнае расстройства — лёгкую разумовую адсталасць, але можа ўсведамляць свае дзеянні.
Пракурор запрасіў для абвінавачанага пазбаўленне волі на тры гады. Суддзя згадзілася з пакараннем і дадала да яго месяц з неадбытай раней "хатняй хіміі".
Крыніца: Мужчыну з інваліднасцю асудзілі да трох гадоў і аднаго месяца калоніі