Падазраваны ў абразе супрацоўніка МУС - 40-гадовы беспрацоўны жыхар Віцебска, які ў нецэнзурнай форме выказаўся на адрас ўчастковага інспектара міліцыі Бабруйскага ГУУС. Следчыя выявілі, што ў дзеяннях падазраванага нібыта прысутнічаюць усе прыкметы злачынства, якія паказваюць на абразу міліцыянта.

Свае дзеянні мужчына патлумачыў эмацыйнай рэакцыяй на ілжывую інфармацыю ў сацсетках. Ён раскаяўся і папрасіў прабачэння ў супрацоўніка міліцыі.

Таксама стала вядома, што ў верасні 2020 году віцяблянін прыцягваўся да адміністрацыйнай адказнасці за аналагічныя дзеянні ў дачыненні да іншых службовых асобаў. Акрамя таго, у сакавіку 2021 году ён адбываў адміністрацыйны арышт за размяшчэнне на асабістай старонцы ў сацыяльнай сетцы нацысцкай сімволікі.

Матэрыялы праверкі перададзеныя ў СК.

Адзначаецца, што гэтым разам мужчыне пагражае не адміністрацыйная, а крымінальная адказнасць.

У выпадку, калі падчас судовага разгляду будзе ўстаноўлены факт абразы міліцыянта, фігуранту справы пагражае да трох гадоў абмежавання волі ("хімія").

Міхась Пісараў