Адміністрацыйную справу  Георгія Каржанеўскага  паводле ч.2 арт.19.11 КаАП і ч.2 арт. 19.10 КаАП разбірала суддзя Кацярына Цыбульская.

У Віцебску гэта ўжо стала традыцыяй: разбіраць палітычна матываваныя «адміністратыўкі» прызначаюць маладых суддзяў, якія зусім нядаўна атрымалі свае першыя прафесійныя пасады. Так, Кацярына Цыбульская толькі ў студзені гэтага года была прызначана суддзёй суда Першамайскага раёна, да гэтага яна колькі часу адпрацавала памочнікам суддзі. З самых першых дзён на новай пасадзе дзяўчыну пачалі накіроўваць на розныя сустрэчы ў працоўных калектывах, дзе яна выступала з прамовамі пра небяспеку падпісак на «экстрэмісцкія інтэрнэт- рэсурсы».

Як мы ўжо пісалі, у судзе Кастрычніцкага раёна Віцебска адміністрацыйныя справы паводле паводле ч.2 арт.19.11 КаАП апошнім часам прызначаюць разглядаць суддзю Ганну Кот, якая была прызначана на гэтую пасаду ў 2022 годзе.

Што да адміністрацыйнай справы Георгія Каржанеўскага, то судовае рашэнне па ёй пакуль не вядомае. У апошнія гады ён адышоў ад журналісцкай працы, больш займаўся ўласнымі культуралагічнымі праектамі, час ад часу ездзіў за мяжу – на заробкі і да сяброў.

Максім Салаўёў