Ігар Аліневіч зьмешчаны у атрад былых пракурораў і судзьдзяў
Палітвязень Ігар Аліневіч, якога трымаюць ў віцебскай калёніі «Віцьба-3», нядаўна быў пераведзены ў іншы атрад, у які раней трапілі некаторыя былыя начальнікі, міліцыянты, пракуроры і судзьдзі. Паводле Ігара Аліневіча, паводзяцца яны цяпер гэтак, што пра былы высокі статус ніхто б не здагадаўся.
Будаўнікі Віцебшчыны зноў на апошнім месцы
У студзені-лютым 2015 году будаўнікі Віцебскай вобласьці ўвялі ў эксплёатацыю каля 32 тысяч квадратных мэтраў жытла, чым і забясьпечылі вобласьці апошняе месца па краіне.
Асуджаная былая галоўная бухгальтарка Віцебскага цэнтральнага спартовага комплексу
Набыў моц прысуд у дачыненьні да былога галоўнага бухгальтара Віцебскага цэнтральнага спартовага комплексу. Вэрдыкт суду: пакараньне ў выглядзе пазбаўленьня волі тэрмінам на пяць гадоў з адтэрміноўкай выкананьня пакараньня на тры гады з пазбаўленьнем права займаць пэўныя пасады.
Міністэрства працы і сацыяльнай абароны паабяцала ўлічыць прапанову віцебскага праваабаронцы
Міністэрства працы і сацыяльнай абароны Рэспублікі Беларусь паабяцала ўлічыць прапанову праваабаронцы Леаніда Сьвеціка пры дапрацоўцы праекту нарматыўна-прававога акту, накіраванага на прафіляктыку сацыяльнага ўтрыманства.
У Полацку абмеркавалі ўдзел грамадзян у мясцовым самакіраваньні
У Полацку 21 сакавіка адбылася дыскусія аб магчымасьцях удзелу ў мясцовым самакіраваньні. З палачанамі сустрэліся экспэрты ў галіне самакіраваньня мясцовых супольнасьцяў праваабаронца Леанід Гаравы і юрыст Міхаіл Пліска. Грамадзяне яшчэ маюць магчымасьці ўплываць на прыняцьце рашэньняў на мясцовым узроўні, але гэтыя магчымасьці мінімальныя. Беларусам яшчэ далёка да эўрапейскіх стандартаў ўдзелу грамадзян у кіраваньні жыцьця ў сваёй мясцовасьці і, тым больш, у сваёй краіне.
На «Нафтане» скарачаюць працоўныя месцы
Завод «Палімір», які ўваходзіць у склад ААТ «Нафтан», спыніў выпуск сынтэтычнага валакна Нітрон-З, аднаго з асноўных відаў сыравіны, якія выкарыстоўваюцца ў беларускай лёгкай прамысловасьці. Прадпрыемства пазбавілася каля 600 працоўных месцаў.
На Віцебшчыне праходзіць акцыя ў падтрымку жыцьця і сямейных каштоўнасьцяў
Віцебская вобласьць далучылася да шырокамаштабнай духоўна-асьветніцкай акцыі «Разам – у абарону жыцьця, маральнасьці і сямейных каштоўнасьцяў», абвешчанай Міністэрствам аховы здароўя Рэспублікі Беларусь.
У Віцебскай вобласьці 38 чыноўнікаў прыцягнулі да адказнасьці за парушэньні працэдуры прыватызацыі
У Віцебскай вобласьці 38 службовых асоб гарадзкіх раённых выканаўчых камітэтаў і арганізацыяў жыльлёва-камунальнай гаспадаркі прыцягнулі да дысцыплінарнай адказнасьці за дапушчаныя парушэньні падчас правядзеньня працэдур прыватызацыі. Пра гэта паведамілі ў Генэральнай пракуратуры Беларусі.
Леаніда Аўтухова вырашылі прыстрашыць падатковай інспэкцыяй
Актывіста выклікалі ў падатковую інспэкцыю, каб ён даў справаздачу пра свае даходы за апошнія 10 гадоў. Леанід Аўтухоў папрасіў даць дэклярацыю на беларускай мове, аднак яму адмовілі і заявілі, што згодна з пастановай Савету Міністраў дэклярацыі павінны быць толькі па-расейску. Таксама ў выпадку адмовы запаўненьня дэклярацыі актывіста прыстрашылі, што на яго складуць пратакол.
Сьледчыя органы Віцебскай вобласьці занепакоеныя дзейнасьцю “чорных капальнікаў”
Як паведаміла афіцыйны прадстаўнік упраўленьня Сьледчага камітэту па Віцебскай вобласьці Іна Гарбачова, працягваецца расьсьледаваньне крымінальнай справы па факце выяўленьня ў Дубровенскім раёне ў лістападзе 2014 году трупа мужчыны 1982 году нараджэньня. Ён падарваўся на снарадзе часоў ВАВ. Загінулы захапляўся пошукам боепрыпасаў. Пра гэта сьведчаць паказаньні сваякоў, а таксама знойдзеныя на месцы здарэньня мэталашукальнік, чатыры боегалоўкі ад снарадаў, дэтанатары, фрагмэнты боепрыпасаў.